العيش الشمسى (الصعيدى )

    العيش الشمسى (الصعيدى )

اولا: سمى هذا العيش بالشمسى لأنه يتخمر فى الشمس ثم يخبز بعد ذلك فى الأفران

ثانيا : الادوات المستخدمه

المقارص (هى التى يوضع عليها الرغيف عشان يخمر وننقله من مكان لآخروتتكون من الورق او من الخشب ويمكن استخدام كرتون مقوى  )

 

المطرحه (التى تستخدم فى إدخال الرغيف فى الفرن )

ملاحظات

  الكمية المخبوزة فى الغالب تكون كبيره لتكفى مدة طويلة قد تصل إلى 15 يوم 

الخميره يتم شرائها من المحلات الخاصة أو من الأفران ويمكن عملها فى البيت وتوضع فى الدقيق لحين الحاجة إليها   
  

بالنسبه لنوع الدقيق يكون مخلوط من دقيق بلدى ودقيق فاخر

 

 العيار المستخدم قى الكيل عبارة عن علبه سمن فارغة سعة  2 كيلو
 

المقادير 

كمية دقيق حسب الطلب وفى الغالب كما قلنا بتكون كمية كبيرة 7 علب  من الدقيق البلدى وعلبة من الدقيق الفاخر

قليل من الملح
الخميره كما وضحنا سابقا

لو هنخبز العيش الصبح يبقى نعجن الخميره من بالليل

طريقه عمل الخميره

هنحط الخميره اللى هنشتريها من الفرن مع علبه ونص دقيق(من ال8 اللى قلنا عليهم) ونعجنهم بالماء وتترك الى الصباح لكى تخمر

قبل الخبيز نحضر المقارص ونفرشهم طبقه خفيفه واحده واحده بالرده عشان ميلزقش فيهم العجين زى كده

هنبدأ العجن

الماء بيكون حسب مايحتاج العجن وممكن زيادة الماء إذا لاحظنا أن العجينة تحتاج إلى الماء فنضع الماء الدافئ والملح ثم الخميره البيره ثم الخميره اللى احنا عملناها من بالليل ثم الدقيق

ونعجن على قدر ما نستطيع حتى تكون شكل العجينة كما فى الصورة التالية

نبدأ بتقطيع ( بتقريص ) العجين باليد  بالحجم المناسب زى كده

وندورها أو نكورها فى إيدينا ونلمّسها فى الدقيق قبل وضعها على المقرصه

ثم يوضع على المقارص ونكرر بنفس الطريقه كل الكميه

بعد الإنتهاء من تقطيع العجين نصل لمرحلة فرد العجين (يعنى نفرده باليد ونكون ماسكين قطعة من القماش )

هنا فى الصوره الفرق بين العجين قبل الفرد وبعده

بعد الإنتهاء من فرد كل العجين نطلعه فى الشمس

نتركه فترة لحد مايخمر ونلمس وجه العجين نلاقيه بقى جامد مش طرى ونقلبه على الوش التانى اللى فيه الرده ونسيبه يخمر كمان شويه

بعد ما يتم تخمير العجين كله فى الشمس نرجعه فى الظل تانى
ونبدا نشققه ، والتشقيق بيكون على داير الرغيف بالسكينه زى كده

بعد ذلك يأتى دور المطرحة و نضع العجين عليها بحيث يكون وجه الرغيف اللى فيه الرده من تحت وتضغط على الرغيف ضغطه خفيفه بايدها وترصه جوا الفرن

نضع الأرغفة فى الفرن حسب سعة الفرن وبتكون فيه نار من تحت ونار من فوق زى كده

هنسيبه لحد مالونه يحمر من فوق ومن تحت

وبيكون شكله النهائى كما فى الصور